 |
|
|
| Dimanche 02 Decembre 2007 |
|
| Sarkozy è a Corsica |
| Per u più, à sente i ghjurnalisti è i puliticanti, pare ch’ellu fussi ghjuntu in Corsica per pocu affare. Da u timpacciu à l’azezume di i naziunalisti Corsica Nazione, sta visita, a seconda in dui mesi hà fattu cum’è a scopa. Hè fiurita ma ùn hè granata. Ognunu s’aspettava à annunzi impurtanti in u filu di a creazione di a cummissione ad hoc di l’Assemblea di Corsica. Fatt’è fine, s’è a so presenza simbolica era cum’è quella di a lesina ind’un saccu. S’è u so discorsu è i so silenzii eranu più un bilanciu ch’è un prugettu, anu quantunque difinitu u quadru di a so azzione.
| 
A lingua
Dimmula franca è chjara, quandu ellu avia dettu d’agostu chì si puderebbe andà luntanu nant’à u particulare di a lingua, avia inghjennatu assai speranza. Ma in u filu di u so ricusu di ziffrà a cartula di e lingue minuritarie, hà fattu un passu in daretu dicendu chì u limitu, ambiguu, era quellu di l’ufficialità di u francese. Bona, ma l’ufficialisazione di a lingua corsa ùn rimette mancu appena in causa quella di u francese. Sarebbe una cuufficialità. Oramai, s’ellu dice sustene a pulitica linguistica di a CTC, pare ch’ellu aspetti ch’ella li fessi a dumanda, ancu puru pigliendu u risicu di diceve è di purtà ci di fole in canzone.
L’istituzione
À u pianu di l’istituzione, ci hè una cuntradizzione trà u so discorsu in Corsica è a so azzione à i piani francesi è eurupei. Hè ellu chì hà permessu l’accunsentu di i 27 paesi di l’Unione Eurupea nant’à u Trattatu simplificatu. È quessa, malgratu u ricusu di i Francesi, di maghju 2005, d’aduttà a Custituzione eurupea. À u pianu francese, ci ne dà l’esempiu incù a cummisione creata apposta nant’à a quistione di l’istituzione è patrunata da Balladur. Perchè tamantu blucchime incù a Corsica ? A dimucrazia hè cum’è un ghjocu. Quellu chì vince una partita pò perde a prussima volta. Ùn hè mai chjosu u dibattitu. In dimucrazia, u risultatu à un referendum o à un elezzione ùn hè mai una decisione definitiva. Ùn hè mai acquistu u risultatu. Cambianu e situazione, i bisogni è i parè di e ghjente. Quessa pò a saperà ancu ellu, postu chì ci si cunosce nant’à e scunfitte eletturale. A chjusura di u dibattitu nant’à l’istituzione hè un sprupositu per un paese dimucraticu perchè hè lecitu di vulè migliurà le sempre, à prò di e ghjente.
L’ambiu
Hà parlatu assai di l’ambiu. Dapoi u Grenelles, pare ch’ellu fussi una priurità in Francia ma ancu ind’u mondu per via di u premiu Nobel datu à Al Gore. In Corsica, da a lotta contr’à u nucleariu in l’Argentella à a difesa di u liturale, passendu per e fanghe rosse, si pò dì ch’ella hè sempre stata viva a cuscenza eculogica. Eppuru, scarichi salvatichi, quantu ellu ci n’hè ind’è noi ? A quistione di u trattamentu di i ghjetti ùn hè ancu sciolta è si tratta sempre di custruì un incineratore. In quantu à i lochi salvatichi, pare ch’elli fussinu minacciati da u Padduc. Oramai, ci tocca à traduce stu penseru eculogicu in un modu d’azzione è di custruzzione di a Corsica, à longu andà.
L’onore
Parlendu di i naziunalisti è sopratuttu di i clandestini, hà dettu chì mancavanu d’onore postu chì e so azzione, e facianu à l’appiattu. Serà una ragiò per ricusà di parlà cun elli ? A pace, ùn si face mai incù l’amichi. Eppò quandu omu abbraccia à Poutine, vene male di dà lezziò d’onore o di muralità à e ghjente. Dumandate à Kasparov, à e famiglie di Litvinenko è di a giurnalista Politovskaia o à i zitelli Cecceni quantu ellu hè manescu incù a dimucrazia Vladimir…
U sviluppu ecunomicu è u suciale
S’aspettavanu i sindicati à annunzii impurtanti, frà quali a stesa di a prima d’insularità. Sò stati belli dilusi. Hè vera chì e cunsequenze di sta prima ùn sò stabilite bè. S’ella vene sempre megliu di tuccà la, puderebbe cuntribuisce dinù à rialzà i prezzi. Eppò in u cuntestu ecunomicu oghjincu, vene male à Sarkozy di dà stu rigalu à i Corsi. Hè l’inseme di i Francesi chì pate d’una calata di u putere cumpraticciu. Infine, à u pianu puliticu, hè un segnu forte di rumpitura incù l’usi anziani è e ripresentazione di i Corsi. Quandu Berta filava, a Francia era sempre una putenza mundiale…
A pulizza
Un antru affare di primura durante sta visita, ghjè u dispusitivu pulizzeru. Appuntu, postu chì trattemu di e spese publiche, ognunu s’hè dumandatu quantu custava stu cunsigliu ministri dicentralizatu. S’hè posta dinù un antra quistione più pulitica nant’à l’arrestu di u prifettu chì hà pruibitu e manifestazione di i sindicalisti è di i naziunalisti. Quessa pò marca male in u paese di i diritti di l’Omi. A prisenza pulizzera puzzava l’uccupazione è i giurnalisti anu ancu dettu chì seria forse quessa l’infurmazione chì firmerebbe ind’è e mente.
Una rumpitura
Eppuru, u discorsu di Sarkozy à l’Assemblea di Corsica hè impurtantissimu. S’è u so discorsu, scrittu di sicura da Gueno, hà ripigliatu a riturnella puetica, ma anticogna di a Corsica francese, al di là di a simbolica di a rettorica, marca una vera rumpitura.
Ritengu quì a so critica, corta ma incalcata di u clanisimu. Hè u male di a Corsica. I cummunisti di u dopu guerra è i naziunalisti l’anu dinunziati i vizii di stu sistema puliticu. Zuccarelli l’hà fatta dinù, quandu si ne cacciava incù Giacobbi ! U clanisimu s’hè sviluppatu nant’à l’idea chì a Francia era più ricca ch’è a Corsica è ch’ella pudia aiutà i Corsi à u pianu individuale. Per esempiu qualchissia avia dumandatu à Arena perchè avia datu un postu di fattore à un omu chì ùn sapia mancu leghje. Avia rispostu chì s’ellu sapia leghje, l’averia fattu prifettu !
Oramai, s’ella vene da Parigi a critica, hè l’inseme di a pulitica corsa chì hè chjamata à a mossa. Perchè ? In u cuntestu ecunomicu oghjincu, u Statu ùn si pò più permette di finanzà, à ochjichjosi, u mantenimentu di i clani. L’elettori francesi sò dinù cuntributori. Volenu ch’elle fussinu ghjustificate e spese publiche. A seconda ragiò hè chì una sucetà civile spunta in Corsica dapoi quaranta anni. E scelte pulitiche, serianu, secondu l’elezzione, di menu mutivate da mutivi privati ch’è da e cunvizione è l’idee di e ghjente. A pulitica divente un affare publicu. Quessa sì chì ghjè una revoluzione. Tocca à noi di purtà e suluzione à i nostri capatoghji. Da Parigi, l’hà detta Sarkozy, ci hè pocu da aspettà.
| | | > Commentaire(0) | |
|
|
| Crunichetta |
| Chì hà soldi è amicizia torce u nasu à a ghjustizia…
Hè bona di dinunzià a mancanza di demucrazia in Russia. Hè bona di difende u dirittu à a presunta di nucenza per André Santini è Bernard Laporte. Quessu u dirittu, l’anu ancu elli. Ancu puru s’elli sò ministri. Pocu impreme a so funzione. Seria una bona dinù ch’ella fussi lasciata à tutt’ognunu sta presunta di nucenza. Quessa sì chì saria una rumpitura, cù l’usi è u pruverbiu… | 
Urientazione
Un prublema maiò di u sistema educativu cuncerna l’urientazione di l’elevi. Tenite, pigliemu à Sarkozy. Avucatu di prufessione, hà riesciutu è bè. Ma à sente lu parlà di Colonna è d’altri, si capisce chì s’hè sbagliatu. U corciu, invece d’esse avucatu è di difende e ghjente, li saria piaciutu di più d’esse ghjudice da pudè le cundannà.
Prumessa eletturale
Ne hà parlatu assai Sarkozy di a rumpitura durante a campagna. Rumpitura incù Chirac, e spese publiche, trenta anni di lascia corre è, sottu sottu, di vinti anni di strazii incù a moglia... Pare chì l’angoscia fussi tremenda per Cécilia. A s’hà pigliata male, malissima. A s’hà pigliata per ella, a corcia, è hè partuta. Ùn hà tricatu tantu à fà la sapè chì a rumpitura, trà ella è u presidente, era bella fattiva, dumandendu u divorziu… Quessu sì chì e tene e so prumesse !
U bilicaghjisimu
Ma quandu hè chì l’averanu pò capita ch’elli ùn sò micca i più forti ? Chì passione ! Da
Rivarol è a so lingua à Laporte è a so squadra, u bilicaghjisimu è l’urgogliu sò mali francesi. Dopu, hè sicura chì falanu cutrate… Da Waterloo à u Stadiu di Francia, in fatti di guerra, di lingua, è ancu di ballò, sò l’Inglesi chì piglianu a suprana… O Bà, tamantu sbagliu ! Tandu sì chì ci vulia à tene li stretti l’Inglesi !
Guy Moquet è Ghjuvanni Nicoli
S’hè letta u 22 d’uttobre a lettera di u giovane risistante francese Guy Moquet. Certi prufessori di l’isula ùn l’anu vulsuta leghje sta lettera. Mutivu puliticu, storicu o pedagogicu, nisunu a sà. Dicianu chì ùn era micca abbastanza « cuntestualizata » sta lettera. Eppuru, ùn l’anu fatta à prupone a lettura di quella di Ghjuvanni Nicoli. Soca, u soiu u missaghju, serà statu ghjudicatu troppu arradicatu à u nostru locu ?
Rousseau è i Muvrini
A dicia Rousseau, chì un ghjornu, l’Europa sana guarderebbe a nostra isula. Incù i Muvrini, si pò dì ch’ella stà à sente à a voce di a Corsica. È quandu elli collanu nant’à a scena, in Brusselle, Parigi o Amsterdam, tandu sì chì l’Europa a guarda a nostra Corsica. L'avia detta Rousseau !
Regimi specifichi
In Corsica, hè stata poca a manifestazione à prò di a difesa di e ritirate. E linguacce diceranu chì i Corsi ùn anu bisognu di manifestà per e ritirate postu chì ùn travaglianu micca, techji ch’elli sò elli !
Prima di trasportu
Dipoi l’89, ogni funziunariu in attività in Corsica tocca a prima di trasportu. St’ultimi tempi, si hè parlatu assai di sparghje la à i travagliadori di u privatu. Ma dapoi ch’ella hè à paghjolu a Francia, si dice chì à mumenti, sta prima, a ci l’anu da caccià. Mi dicerete : « ma perchè ? ». Ùn la sapite voi quantu elli costanu quelli viaghji in Corsica ?
Quant’ellu dice !
Dice assai Sarkozy. Pensa per esempiu chì a prima di trasportu ùn puderà scioglie a quistione di u putere cumpraticciu di i Corsi. Dice dinù, chì a suluzione venerà solu da u rialzu di a crescitura ecunomica. Ma tandu, quandu si tratta d’entre ind’i fatti, tandu, ùn dice più nunda. Forse, ùn la saperà mancu ellu cumu si face per rialzà u cunsummu di e ghjente…
Serviziu
U 28 d’uttobre, s’hè parlatu di l’Università nant’à l’emissione « Cuntrasti ». Hà spiegatu Mondoloni chì oramai tuccava à l’Università di participià à u sviluppu di a Corsica. Questa hè bella a passata ! Ci n’hè poche strutture chì l’accumpagnanu stu sviluppu ! Ma à leghje l’ultimi studii di l’Insee, a Corsica sarebbe un rughjonu di miseria. Hè sicura chì l’Università abbia à aiutà a Corsica, ma ci vole dinù chì i puliticanti piantessinu di mette i Corsi à u so serviziu in tempu d’elezzione… À u cuntrariu, tocca à elli di mette si à u serviziu di tutti i Corsi è di a Corsica… Sarebbe ora, chè ? A dice l’Insee !
Ghjudiziu
E ghjente si lagnanu sempre di i so eletti. À quandu ùn tenenu e so prumesse, à quandu e rispettenu troppu ! Vene faciule di dinunzià a respunsabilità di l’azzione di i puliticanti ind’a so cundizione. Ma in dimucrazia, vene faciule dinù di scambià li. Hè per quessa ch’elle sò sparite tutte tutte e dinastie, ind’è e dimucrazie. Invece di pienghje dopu, basta à riflette un suppulellu nanzu di vutà.
Generali
Tempi fà, in tempu di froda eletturale, c’era di menu ghjente viva ch’è ghjente scritta nant’à e e liste eletturale. Invece, à ghjorni d’oghje, avemu quasi più eletti ch’è elettori : 2 senatori, 4 diputati, 51 cunsiglieri territuriali, 48 cunsiglieri generali à capu insù, à capu inghjò, 360 meri è di più di menu 5000 cunsiglieri municipali -ùn li pudemu ancu più cuntà- chì participeghjanu dinù à una vintina di strutture intercumunale. Parenu fole ! A dicia digià Paoli ch’ellu avia di più generali ch’è suldati. Soca sarà più faciule à mette e mani ind’è l’urne ch’è ind’a pasta…
| | | > Commentaire(0) | |
|
|
| Prucessu Colonna |
| Hè un evenimentu maiò per a Corsica u prucessu d'Yvan Colonna...
www.yvan-colonna.com |  Appena dopu u prucessu, hè passatu nant'à u 5 un ducumintariu nant'à Yvan è e riprisentazione di Corsi nanzu à u prucessu nant'à quellu affare.
Un giovane cacciadore hè statu interrugatu. U giurnalistu li hà dumandatu: "U prucessu d'Yvan Colonna,pensate ch'ellu hà da esse quellu di i naziunalisti è di i Corsi?" Dopu una stonda di riflessione, hà dettu : "innò, mancu appena, hà da esse quellu di a Francia".
Stu cuntrastu dice tuttu di st'ultimi trenta anni è di e cuntradizzione di i Corsi. Falanu in carrughju per cundannà l'assassiniu di u prifettu ma sò altrettante à firmà a petizione à prò d'Yvan Colonna!
Quandu i Corsi dumandanu à u Statu di stabilisce un statu di dirittu, hè listessu Statu chì inghjenna u scumbugliu lampendu nucenti in prigiò è purghjendu a difesa à i clanisti chì à sente à Sarkozy, averianu "arruvinatu a Corsica"!
| | | > Commentaire(0) | |
|
|
|
|
|
Toute la Corse sur Club-Corsica.com |
|
Blogs
Weblogger
Derniers articles
Rubriques
Liens
Ce qu'on en dit
Infos blog
Mes alertes 
Connexion
Calendrier
Top de la semaine