 |
|
|
Manifestazione contr'à a vita cara
|
A manifestazione contr’à a vita cara hà accoltu 2000 persone. Corsi da ogni orizonte puliticu ci anu participatu. Sò falati ancu naziunalisti…
|
E rivindicazione di i sindicati eranu chjare : mantenimentu di i prezzi di a roba d’usu ghjurnalaghju, di e pighjò, crescita di e paghe è in particulare di a prima di trasportu. Sò belle è bone st’idee ma attempu sò terribile. Seremu sempre ubbligati à chere un pezzu di pane à u Statu ? In quantu à i pruprietarii chì ùn sò tutti ricchi, li tuccherebbe à mantene u livellu di e pighjò. È cusì sia. È dumane, di tutte ste ghjente in difficultà, chì ne sarebbe di a so sorte ?
Hè logica chì sindicati francesi vaghinu à chere aiutu à u Statu. Hè a so riturnella. Dicenu chì senza u Statu, a Corsica ùn pò tene, i Corsi ùn ponu manghjà è tira avanti è tocca ! In quantu à u STC, mi si pare chì ùn vole micca esse quellu chì si sarebbe oppostu à a crescita di a prima di trasportu chì à tuttu ognunu face prò, ch’omu sia naziunalistu è scruccarellistu. Chì di l’altri si veste hè prestu spugliatu. A prima ùn crea u sviluppu ecunomicu. Pò piattà, à pezzi è à bucconi, a miseria di a ghjente. Pò ancu calmà a zerga di u populu ma hè bungerda cum’è a scopa. U STC chì hà participatu à sta manifestazione chì parte da un custattu ghjustu ma chì svia dumandendu à l’assassinu di rinvivì una isula chì và à caternu, chì perde a so ghjuventù è chì strazia per campà.
U peghju in sta manifestazione ùn hè micca u cumpurtamentu upportunistu di u STC, hè di vede quantu a ghjente perde a fede in ella stessa. A so speranza à ella, ùn hè micca l’indipendenza, hè u Statu. Bisognu c’hè per i naziunalisti di vultà in carrughju, vicinu à a ghjente. À chì ghjove di ragiunà nant’à a leghjittimità di a presenza francese, di a lingua è di u fronte o ancu d’indipendenza s’è a ghjente pate a fame avà. Quand’elle sò longhe e fine di mesi, ch’ellu si sente u viulinu in corpu, a ghjente ùn capisce altri capatoghji. Avemu bisognu di risposte chjare, cuncrete à e nostre primure. Ma attenti à un micca pattighjà, à ùn purtà suluzione false, impizzutite, chì ùn ponu ch’è accresce u prublema.
Ci vole à fà la finita cù u Statu. A suluzione, s’ella c’hè, per st’isula, hè corsa. Tocca à noi di custruì stu paese invece di fà sventulà bandere à nomi di sindicati chì ùn facenu manghjà ch’è i so purtavoci. Tocca à noi, di custruì una strada luntanu da i clanisti chì si mantenenu per via di sta miseria.
Per quessa, bisogna à sviluppà u settore privatu avendu un sguardu novu nant’à l’intrapresa. Si dice chì i Corsi ùn piglianu micca risichi, chì anu a paura di lampà si in intraprese ma sarà forse per via di a mimoria cumuna ch’è n’avemu di a lege duganera, serà forse per via di a fola chì dice chì a « Corsica non avrà mai bene » o di l’impositu marsegliese nant’à i trasporti. Eppò, dimmula franca è chjara, quantu giovani ùn sò micca sustenuti da e banche per cumprà si una casa allora pensate s’elle ci sustenenu per creà un impresa ! Eppò, in Corsica quantu intraprese furestere si sò stallate ? I clanisti diceranu, bocchifini, chì anu a paura di u clima di viulenza ma ind’è l’anni sessanta o cinquanta, ci n’eranu tandu ?
A Corsica hà da creà ricchezze. Per quessa, bisogna à mette in ballu un veru statutu fiscale à prò di l’intraprese. Sò elle chì ci ponu caccià da sta situazione. Ch’elle fussinu create da Corsi o micca, pocu impreme. Più ch’è i travagli dati à i purtughesi in u bastimentu, sò l’impieghi qualificati chì saranu u mutore di a Corsica di dumane.
|
|
| > Envoyer cet article à un ami |
| Commentaires |
| Ajouter un commentaire |
Scriviti bè: ghjè quì, in lingua nustrale, dighja un bebefattu; éu ùn ci so andatu à ssa manifestazione.
Parchi?
Parchi a CGT, pa esmpiu, mi dispiace tantu...
sepercorsicus (11/05/07 17:45) |
|
|
|
|
|
|
|
|
| Février 2007 |
| L | M | M | J | V | S | D |
| | | | 1 | 2 | 3 | 4 | | 5 | 6 | 7 | 8 | 9 | 10 | 11 | | 12 | 13 | 14 | 15 | 16 | 17 | 18 | | 19 | 20 | 21 | 22 | 23 | 24 | 25 | | 26 | 27 | 28 | | | | | | << >> | |
|
|
Blogs
Weblogger
Derniers articles
Rubriques
Liens
Ce qu'on en dit
Infos blog
Mes alertes 
Connexion
Calendrier
Top de la semaine